new tai | old tai | 中文

ᦢᦱᧃᧉ ᦷᦃᧂᧈ ᦵᦉ ᦏᦲ ᦓᦾᧉ ᦃᦸᧇᧈ ᦵᦵᦡᧃ ᦋᦱᧆ ᦉ ᦜ ᦀᦱᧆ ᦐᧄ ᦇᦱᧄ

作者: 时间:2021-07-22 08:49:43

0615-03JJZK-002-209737-原文件.jpg

 ᦵᦙᦲᧈ ᦷᦡᧃᧈ,ᦓᧅ ᦃᦱᧁᧈ ᦟᦳᧂ ᦺᦔ ᦵᦙᦲᧂ ᦷᦊᧃᧈ ᦵᦙᦲᧂ ᦘᦳᧂ ᦵᦈᦲᧃᧈ ᦵᦙᦲᧂ ᦟᦱᧉ ᦵᦵᦉᧃᧈ,ᦉᦴᧈ ᦏᦱᧄ ᦢᦱᧃᧉ ᦷᦃᧂᧈ ᦵᦉ ᦏᦲ ᦓᦾᧉ  ᦃᦸᧇᧈ ᦵᦵᦡᧃ ᦁᧃ ᦙᦲ ᦋᦹᧈ ᦵᦉᧂ ᦟᦹ ᦌᦱ ᦓᧃᧉ。

 ᦂᦱᧂ ᦞᧃ ᦐᦱᧉ ᦜᦲᧈ ᧓ ᦎᦱ,ᦉᦻ ᦵᦵᦡᧆᧈ ᦂᦱᧉ ᦟᦳᧄ ᦣᦸᧃᧉ ᦺᦖᧉ,ᦺᦓ ᦵᦙᦲᧂ ᦷᦊᧃᧈ ᦊᦲᧃ ᦵᦍᧅ,ᦙᦲ ᦅᦱᧈ ᦵᦉᧂ ᦈᦱᧉ ᦵᦵᦈᧃ ᦣᦸᧂᧉ,ᦗᦲᧈ ᦓᦸᧂᧉ ᦺᦑ ᦢᦱᧃᧉ ᦓᦲᦰ ᦂᦲᧃ ᦇᦻ ᧟ ᦅᦸᧉ ᦌᧁ ᦵᦵᦣᧂ  ᦊᦴᧈ ᦡᦻ,ᦉᧂ ᦙᦱ ᦉᦳᧅ ᦉ ᦥᦻᦺᦈ,ᦑᦸᧂᦰ ᦡᦴ ᦋᦴᧈ ᦊᦱᧁᧉ ᦋᦴᧈ ᦵᦣᦲᧃ ᦂᦱᧂ ᦷᦃᧂᧈ ᦦᦱᧂᧉ ᦟᦰ ᦟᧂᧉ ᦍᧂ ᦔᦳᧅᧈ ᦡᦸᧅᧈ ᦺᦙᧉ ᦀᦳᧇᧈ ᦊᦸᧂᧉ ,ᦜᦱᧉ ᦵᦵᦉᧂ ᦓᦸᧂᧉ ᦍᧂ ᦵᦵᦔᧂ ᦷᦉᧃ ᦔᦳᧅᧈ ᦕᧅ  ᦔᦳᧅᧈ ᦑᧂ  ᦖᦱᧅ ᦉᦳᧄᧉ ᦟᦴᧅ ᦛᦱᧃ。

ᦍᦱᧄ ᦓᧃᧉ,ᦷᦃᧂᧈ ᦎᦸᧈ ᦖᦱᧅ ᦃᦱᧂᧈ ᦑᦲᧈ ᦷᦠ ᦢᦱᧃᧉ ᦋᦱᧆ ᦷᦙᧃᧈ ᦵᦍᦲᧄ,ᦵᦉᧂ ᦉᦱᧈ ᦵᦵᦓᧃ ᦷᦣᧃᧈ ᦣᦸᧂᧉ。ᦗᦻ ᦀᦸᧃ ᦵᦙᦲᧈ ᦢᧁᧈ ᦵᦵᦔᧂ ᦷᦃᧂᧈ ᦗᦻ ᦺᦓ ᦵᦑᦲᧈ ᦓᧃᧉ,ᦋᦳᧄ ᦜᦻ ᦎᦸᧈ ᦖᦱᧅ ᦃᦱᧂᧈ  ᦗᦻ ᦓᦸᧅ,ᦵᦵᦡᧆᧈ ᦏᦸᧂᧈ  ᦟᦳᧄ ᦏᦸᧉ,ᦠᦱᧅ  ᦷᦑᧅ ᦊᦱᧇ ᦕᦱᧃ ᦺᦈ。ᦢᧆ ᦵᦡᧁᧈ ᦵᦵᦔᧂ ᦷᦃᧂᧈ ᦗᦻ ᦺᦓ ᦡᦲ ᦵᦉ ᧟,ᦑᦲᧈ ᦐᦲᧉ ᦅᦸᧉᦔᦲᧃ ᦑᦲᧈ ᦅᦳᧃ ᦋᦻ ᦎᦸᧈ ᦖᦱᧅ ᦃᦱᧂᧈ ᦡᦲᧃᧉ ᦷᦙᧃᧈ ᦋᦴᧈ ᦞᧃ。ᦓᦸᧅ ᦵᦉ ᦷᦃᧂᧈ ᦎᦸᧈ ᦖᦱᧅ ᦃᦱᧂᧈ ᦺᦔ,ᦗᦻ ᦗᦱᧂᧈ ᦍᧂ ᦙᦲ ᦷᦃᧂᧈ ᦖᦱᧅ ᦟᦳᧄ ᦉᦲᧈ ᦘᦻᧉ ᦌᦲᧁᧉ ᧞ ᦷᦃᧂᧈ ᦖᦱᧅ ᦟᦳᧄ ᦺᦉᧈ ᦷᦂᧂᧈ、ᦷᦃᧂᧈ ᦃᧇ ᦝᦸᧃᧉ ᧞ ᦷᦃᧂᧈ ᦖᦱᧅ ᦟᦳᧄ ᦎᦲᧃ ᦡᦲᧆᧈ。

ᦀᦻᧉ ᦉᦱᧄ ᦗᦲᧂ ᦕᦴᧉ ᦔᦲᧃ ᦋᦴ ᦋᦱᧂ ᦵᦙᦲᧂ ᦷᦊᧃᧈ ᦞᦱᧈ:“ᦢᧆ ᦵᦡᧁᧈ ᦢᦱᧃᧉ ᦷᦃᧂᧈ  ᦉ ᦜ ᦀᦱᧆ ᦐᧄ ᦇᦱᧄ ᦋᦱᧆ ᦵᦖᦲᧃ ᦡᧂᧈ ᦔᦳᧂᧈ ᦷᦣᧇ ᦵᦵᦎᧄᧉ。” ᦵᦣᦲᧃ ᦷᦎ ᦑᦱᧃᧈ ᦊᦴᧈ ᦷᦠ ᦢᦱᧃᧉ,ᦆᦳᧄᧉ ᦵᦣᦲᧃ ᦔᦲᧃ ᦅᦱᧈ ᦡᦸᧅᧈ ᦺᦙᧉ ᦡᦸᧅᧈ ᦙᦸᧃ,ᦃᦸᧂ ᦷᦆ  ᦵᦚᧆᧈ  ᦡᦲ,ᦑᦲᧈ ᦺᦐ ᦅᦸᧉ ᦷᦖᧆ ᦺᦖᧈ ᦺᦉ ᦇᦱᧄ。ᦋᦴᧈ ᦊᦱᧁᧉ ᦋᦴᧈ ᦵᦣᦲᧃ ᦅᦸᧉ ᦵᦖᦲᧃ ᦡᧂᧈ ᦵᦣᦲᧃ ᦷᦎ ᦑᦱᧃᧈ ᦌᧄᧉ,ᦙᦱᧂᧉ ᦚᦱ ᦌᧂᧉ ᦔᦳᧅᧈ ᦡᦸᧅᧈ ᦺᦙᧉ ᦀᦳᧄᧈ ᦊᦸᧂᧉ。ᦵᦵᦏᧄ ᦙᦱ, ᦘᦸᧄᧈ ᦂᧃ ᦵᦵᦎᧂᧈ ᦵᦵᦙ ᦷᦆᧄᧈ ᦑᦲᧈ ᦊᦴᧈ ᦂᦲᧃ,ᦵᦵᦔᧂ ᦣᦸᧂᧈ ᦓᧄᧉ、ᦂᦸᧈ ᦷᦢᧄ ᦔᦳᧅᧈ ᦡᦸᧅᧈ ᦺᦙᧉ ᦚᦳᧂ ᦓᦲᦰ。

ᦔᦲ ᧟ ᦵᦡᦲᧃ ᧖,ᦵᦙᦲᧂ ᦷᦊᧃᧈ ᦈᦸᧉ ᦔᧅ ᦎᦲᧃᧈ ᦔᦲᧃ ᦉᦱᧂᧉ ᦵᦵᦎᧂᧈ ᦢᦱᧃᧉ ᦵᦔᦲᧂ ᦵᦵᦍᧂ ᦵᦉ ᦏᦲ ᦓᦾᧉ ᦃᦸᧇᧈ ᦵᦵᦡᧃ ᦍᦲᧃᧉ ᦓᦱᧃᧉ ᦵᦌᦲᧃ ᦟᦴᧈ ᦷᦠ ᦒᦲ,ᦠᦱ ᦣᦸᧄ ᦺᦡᧉ ᦇᦹᧃ ᦗᧃ ᦖᦹᧃᧈ ᦵᦵᦍᧃᧉ ᦔᦻ ᦙᦱ ᦉᦱᧂᧉ ᦵᦵᦎᧂᧈ ᦢᦱᧃᧉ ᦷᦃᧂᧈ ᦉ ᦜ ᦀᦱᧆ ᦐᧄ ᦇᦱᧄ。ᦑᧂ ᦢᦱᧃᧉ ᦙᦲ ᦣᦾᧉ ᧗᧗ ᦵᦣᦲᧃ ᦔᦲᧃ ᦘᦱ ᦉᦱ ᦺᦑ ᦌᧄᧉ,ᦷᦠ ᦒᦲ ᦓᦲᦰ ᦵᦵᦎᧂᧈ ᦵᦵᦙ ᦠᦸ ᦵᦣᦲᧃ ᦵᦡᦲᧃ ᦡᦱᧁ。ᦀᦻᧉ ᦉᦱᧄ ᦗᦲᧂ ᦵᦂᧆ ᦎ ᦓᦱ ᦞᦱᧈ,ᦗᦻ ᦀᦸᧃ ᦵᦣᦲᧃ ᦵᦵᦔᧂ ᦢᧁᧈ ᦉᦳᧂ,ᦑᦲᧈ ᦊᦴᧈ ᦂᦲᧃ ᦅᦸᧉ ᦷᦎᧅ ᦍᦸᧄ,ᦵᦙᦲᧈ ᦵᦵᦎᧂᧈ ᦵᦵᦙ ᦓᧃᧉ ᦷᦍᧅ ᦉᦳᧂ ᦠᦸ ᦵᦣᦲᧃ ᦑᧂ ᦂᦳᧄ,ᦍᧂ ᦂᧇ ᦺᦉᧈ  ᦑᦲᧈ ᦔᦾᧈ ᦓᧄᧉ ,ᦅᦻ ᦵᦋᧉ ᦃᦸᧉ ᦂᦱᧃ ᦵᦙᦲᧈ ᦍᦱᧄ ᦚᦳᧃ ᦓᧄᧉ ᦷᦏᧄᧉ ᦢᦱᧃᧉ ᦷᦏᧄᧉ ᦷᦃᧂᧈ。ᦵᦵᦏᧄ ᦙᦱ,ᦜᦸᧈ ᦠᦳᧃ ᦑᦱᧂ、ᦵᦵᦔᧂ ᦑᦲᧈ ᦔᦳᧅᧈ ᦎᦳᧃᧉ ᦡᦸᧅᧈ ᦺᦙᧉ ᦀᦳᧄᧈ ᦊᦸᧂᧉ、ᦵᦵᦎᧂᧈ ᦵᦵᦙ ᦃᦳᧄ ᦞᦲᧆ、ᦺᦉᧈ ᦵᦵᦉᧂ ᦺᦝ ᦠᦳᧃ ᦑᦱᧂ ᦚᦳᧂ ᦓᦲᦰ,ᦠᦹᧉ ᦢᦱᧃᧉ ᦷᦃᧂᧈ ᦵᦔᧃᧈ ᦺᦖᧈ ᦺᦉ ᦇᦱᧄ  ᦙᦱ。

ᦋᦱᧂᧈ ᦌᦲᧃᧈ ᦷᦍᧂᧉ ᦕᦴᧉ ᦓᧅ ᦂᦱᧃ ᦵᦈᦲᧃᧈ ᦝᦴ ᦵᦙᦲᧂ ᦘᦳᧂ ᦵᦈᦲᧃᧈ ᦞᦱᧈ:“ᦵᦗᦲᧈ ᦠᦹᧉ ᦃᦸᧉ ᦊᦴᧈ ᦣᦱᧁ ᦂᦲᧃ ᦗᦸᧈ ᦺᦣᧈ ᦶᦙᧈ ᦓᦱ ᦵᦵᦋᧆ ᦵᦵᦋᧆ ᦕ ᦷᦂᧆ ᦏᦹᧂ ᦣᧂᧈ ᦙᦲ ᦔᦲᧃ ᦡᦲ,ᦷᦎ ᦃᦱᧉ ᦎᦴ ᦠᦱᧂᧉ ᦆᦱᧆ  ᦂᦱᧃ ᦉᦱᧂᧉ ᦵᦵᦎᧂᧈ ᧖ ᦚᦻᧈ,ᦅᦹ ᦵᦑᦹᧅ ᦗᦹᧃ ᦖᧃᧉ ᦡᦲ、ᦔᦳᧂᧈ ᦵᦓᦲᧂ ᦃᦸᧂ ᦉᦱᧂᧉ、ᦷᦆᧄᧈ ᦑᦲᧈ ᦊᦴᧈ ᦂᦲᧃ ᦐᧄ ᦇᦱᧄ、ᦃᦸᧉ ᦊᦴᧈ ᦣᦱᧁ ᦂᦲᧃ ᦡᦲ ᦇᦱᧄ、ᦃᦸᧇᧈ ᦵᦵᦡᧃ ᦖᧃᧉ ᦵᦑᧂᧈ、ᦂᦱᧃ ᦉᦱᧂᧉ ᦵᦵᦎᧂᧈ ᦑᦱᧂ ᦂᦱᧉ ᦵᦵᦃᧂ。”ᦷᦎ ᦑᦱᧃᧈ ᦵᦵᦎᧈ ᦺᦡ ᦙᦱ ᦅᦸᧉ ᦀᧁ ᦺᦈ ᦺᦉᧈ ᦂᦱᧃ ᦉᦱᧂᧉ ᦵᦵᦎᧂᧈ ᦢᦱᧃᧉ ᦷᦃᧂᧈ ᦵᦉ ᦏᦲ ᦓᦾᧉ。᧒、᧓ ᦞᧃ ᦓᦲᦰ ᦷᦎ ᦑᦱᧃᧈ ᦑᦹᧅ ᦑᦳᧃᧉ ᦍᦴᧉ ᦂᦱᧃ ᦉᦱᧂᧉ ᦵᦵᦎᧂᧈ ᦑᦲᧈ ᦟᦸᧈ ᦔᦳᧅᧈ ᦕᧅ ᦵᦊᦲᧉ ᦓᦱᧂ ᦵᦃᧁ ᦺᦓ ᦕᦱᧄ ᦷᦜᧂ ᦣᦾᧉ ᧕᧐ ᦙᦴ,ᦂᦸᧃᧈ ᦓᧄ ᦗᦸᧈ ᦺᦣᧈ ᦵᦵᦙᧈ ᦓᦱ ᦔᦳᧅᧈ ᦉᦱᧂᧉ ᦕᧅ ᦵᦊᦲᧉ ᦓᦱᧂ ᦵᦃᧁ。ᦵᦙᦲᧈ ᦷᦡᧃᧈ,ᦕ ᦵᦑᧆ ᦀᦸᧅᧈ ᦇᦹᧃ ᦣᦾᧉ ᦔᦻ ᧓ ᦖᦹᧃᧈ ᦵᦵᦍᧃᧉ、ᦓᧄ ᦗᦱ ᦷᦣᧂ ᦌᦲᧈ ᦵᦵᦓᧉ ᦷᦎᧅ ᦑᦹᧃ ᧗ ᦣᦾᧉ ᦖᦹᧃᧈ ᦵᦵᦍᧃᧉ,ᦉᦱᧂᧉ ᦵᦵᦎᧂᧈ ᦆᦸᧅ ᦖᦴ  ᦗᧃ ᧖ ᦣᦾᧉ ᦘᦲᧃᧈ ᦝᦱᧂᧈ ᦙᦲ;ᦷᦎᧅ ᦑᦹᧃ ᦗᧃ ᧔ ᦣᦾᧉ ᦖᦹᧃᧈᦵᦵᦍᧃᧉ ᦔᦻ,ᦵᦵᦎᧂᧈ ᦵᦵᦙ ᦺᦣᧈ  ᦓᦱ ᦓᧄᧉ ᦗᧃ ᧓ ᦣᦾᧉ ᦙᦴ。ᦶᦏᧄ ᦙᦱ,ᦗᦸᧅ ᦔᦳᧅᧈ ᦓᦱ ᦺᦂᧉ ᦂᦲᧄᧈ ᦢᦱᧃᧉ ᦷᦃᧂᧈ ᦵᦵᦏᧄ,ᦊᦱᧃᧈ ᦉᦱᧂᧉ ᦑᦲᧈ ᦕᦸᧈ ᦑᦸᧂᦰ ᦺᦣᧈ ᦓᦱ ᦢᦱᧃᧉ ᦑᦳᧂᧈ,ᦵᦵᦕᧈ ᦵᦓᦲᧂ ᦂᦱᧃ ᦵᦵᦀᧁᧈ ᦟᦸᧈ ᦕᦸᧈ ᦑᦸᧂᦰ ᦢᦱᧃᧉ ᦑᦳᧂᧈ。

 ᦟᦳᧅ ᦵᦵᦎᧈ ᦗᦹᧂᧈ ᦂᧇ ᦂᦸ ᦊᦱᧂ ᦀᦲᧅᧈ ᦵᦵᦏᧄ ᦎᦱ ᦵᦌᦲᧁᧈ ᦺᦡᧉ,ᦏᦹᧂ ᦢᧆ ᦵᦡᧁᧈ ᦔᦳᧂᧈ ᦵᦓᦲᧂ ᦞ ᦏᦳ ᦵᦃᧁ ᦇᦱᧄ,ᦵᦙᦲᧂ ᦷᦊᧃᧈ ᦑᦹᧅ ᦵᦔᧃᧈ ᦺᦖᧈ ᦺᦏᧈ ᦡᦲ ᦙᦱ ᦋᦴᧈ ᦙᦹᧉ ᦋᦴᧈ ᦞᧃ。(ᦵᦌᦲᧃᧉ ᦋᦲᧃ)