new tai | old tai | 中文 | English | Thai

ᦗᦻ ᦠᦳᧃ ᦞᧃ ᦷᦎᧅ ᦙᦲ ᦗᦲᧈ ᦓᦸᧂᧉ ᦵᦙᦲᧂ ᧑ ᦋᦹᧈ ᦞᦱᧈ ᦺᦎᧉ ᦆᦳᧂ -ᦆᦱᧁᧈ ᦉᦴᧈ ᦏᦱᧄ ᦺᦎᧉ ᦆᦳᧂ ᦆᦱᧁᧈ ᦒᦲ ᧑

作者: 时间:2017-12-22 08:43:00

ᦅᧄᧉ ᦕᦴᧉ ᦷᦂᧆ ᦘᦻᧈ:
  ᦵᦡᦲᧃ ᦱᦱ ᦷᦟᧅ ᧒ᦱ ᦆᧄᧈ ᦏᦹᧂ ᧒᧔ ᦆᧄᧈ,ᦺᦎᧉ ᦆᦳᧂ ᦵᦋᦲᧁᧈ ᦞᦼ ᦵᦵᦌᧃᧈ ᦌᦸᧃᧉ ᦔᦴᧈ、ᦷᦣᧂ ᦐᧂ ᦉᦹ ᦘᦲᧄ ᦒᦸᧃᧉ ᦵᦋᧉ ᦔᧁᧈ ᦺᦎᧉ ᦆᦳᧂ,ᦣᦸᧂᧉ ᦀᧁ ᦓᧅ ᦃᦱᧁᧈ ᦑᧂ ᦵᦌᦲᧃ ᦣᦾᧉ ᦅᦳᧃ,ᦺᦔ ᦉᦴᧈ ᦏᦱᧄ ᦂᦱᧃ ᦉ ᦜ ᦀᦱᧆ ᦐᧄ ᦇᦱᧄ ᦺᦎᧉ ᦆᦳᧂ ᦵᦋᦲᧁᧈ,ᦷᦂᧆ ᦵᦵᦎᧄᧉ ᦆᦱᧁᧈ ᦂᦱᧃ ᦡᦲ ᦺᦎᧉ ᦆᦳᧂ ᦵᦵᦕᧈ ᦠᦹᧉ ᦕᦴᧉ ᦀᦱᧃᧈ ᦑᧂ ᦵᦌᦲᧃ ᦑᦸᧂᦰ。ᦷᦣᧂ ᦐᧂ ᦉᦹ ᦘᦲᧄ ᦅᦸᧉ ᦋᦳ ᦓᦳᧄ ᦓᧅ ᦃᦱᧁᧈ ᦃᧁᧉ ᦘᦸᧄᧈ,ᦎᧂᧉ ᦌᦲᧈ ᦓᦲᦰ ᦺᦔ ᦵᦵᦎᧄᧉ ᦆᦱᧁᧈ ᦂᦱᧃ ᦺᦎᧉ ᦆᦳᧂ ᦉ ᦜ ᦀᦱᧆ ᦐᧄ ᦇᦱᧄ ᧒、᧓ ᦆᦱᧁᧈ ᦶᦕᧈ ᦠᦹᧉ ᦑᧂ ᦜᦻ ᦑᦸᧂᦰ.

   ᦵᦵᦎᧈ ᦺᦡ ᦙᦱ ᦅᦸᧉ ᦺᦡᧉ ᦍᦲᧃ ᦑᧂ ᦜᦻ ᦋᦱᧂᧈ ᦀᦳᧇᧈ ᦎᦱᧃᧉ ᦂᧃ ᦞᦱᧈ ,“ ᦗᧃ ᦓᦱ ᦵᦋᦲᧁᧈ、ᦺᦎᧉ ᦆᦳᧂ ᦵᦋᦲᧁᧈ ᦔᦲᧃ ᦵᦋᦲᧁᧈ ᦉᦹᧇᧈ ᦵᦵᦉᧃ ᦺᦋ ᦺᦙ ᦏ ᦜᦲ ᦔᦲᧃ ᦗᦲᧈ ᦓᦸᧂᧉ ᦂᧃ”,ᦁᧃ ᦓᦲᦰ ᦠᦱᧅ ᦀᦳᧇᧈ ᦠᦹᧉ ᦣᧁ ᦺᦞᧉ ᦊᦱᧈ ᦏᦱᧉ ᦟᦹᧄ,ᦣᧁ ᦍᧂ ᦙᦲ ᦗᦲᧈ ᦓᦸᧂᧉ ᦵᦙᦲᧂ ᧑ ᦋᦹᧈ ᦞᦱᧈ ᦺᦎᧉ ᦆᦳᧂ。ᦺᦎᧉ ᦆᦳᧂ ᦔᦲᧃ ᦈᦹᧈ ᦈᦹᧈ ᦵᦋᦲᧁᧈ ᦘᦱ ᦉᦱ ᦺᦑ ᧞ ᦘᦱ ᦉᦱ ᦋᦲᧃ ᦷᦘᧈ,ᦊᦴᧈ ᦗᦻ ᦠᦳᧃ ᦞᧃ ᦷᦎᧅ ᦍᦲᧃᧉ ᦓᦱᧃᧉ ᦵᦌᦲᧃ。ᦺᦎᧉ ᦆᦳᧂ ᦐᦽᧈ ᦺᦓ ᦙᧃ ᦓᦲᦰ ᦞᦱᧈ ᦔᦲᧃ“ᦢᦱᧃᧉ ᦵᦙᦲᧂ ᦑᦲᧈ ᦓᧄᧉ ᦆᦳᧂ(ᦓᧄᧉ ᦵᦵᦙᧈ ᦐᦴᧈ ᦵᦵᦋᧂᧈ) ᦔᦸᧆ ᦺᦎᧉ ”。 ᦔᦲ ᦱ᧙᧕᧓ ᦷᦎ ᦎᧂᧉ ᦔᦲᧃ ᦈᦹᧈ ᦈᦹᧈ ᦌᦲᧈ ᦘᦱ ᦉᦱ ᦺᦑ ᦘᦱ ᦉᦱ ᦋᦲᧃ ᦷᦘᧈ 、 ᦔᦲ ᦱ᧙᧕᧖ ᦷᦎ ᦵᦔᧃᧈ ᦔᦲᧃ ᦈᦹᧈ ᦈᦹᧈ ᦵᦋᦲᧁᧈ ᦘᦱ ᦉᦱ ᦺᦑ ᦘᦱ ᦉᦱ ᦋᦲᧃ ᦷᦘᧈ, ᦑᧂ ᦵᦋᦲᧁᧈ ᦙᦲ ᦵᦙᦲᧂ ᦧᦸᧃ (ᦙᦱᧂᧉ ᦉᦹᧈ)、 ᦵᦙᦲᧂ ᦙᦱᧁ(ᦊᦼᧈ ᦜᦲᧈ) 、 ᦵᦙᦲᧂ ᦞᧃ ( ᦷᦟᧂ ᦌᦸᧃᧈ)、ᦵᦙᦲᧂ ᦟᦱᧉ (ᦍᦲᧃᧉ ᦵᦵᦋᧂᧈ)、 ᦵᦙᦲᧂ ᦑᦲ ( ᦵᦵᦟᧂᧉ ᦷᦆᧉ) ᧕ ᦵᦵᦉᧃᧈ ᦉᦹᧈ,ᦵᦉᧃᧉ ᦅᦳᧃ ᦷᦙᧃ ᦙᦲ ᦣᦾᧉ ᧒᧗ ᦖᦹᧃᧈ ᧙ ᦗᧃ ᦅᦳᧃ,ᦙᦲ ᦘᦱ ᦉᦱ ᦺᦑ、ᦘᦱ ᦉᦱ ᦋᦲᧃ ᦷᦘᧈ、ᦘᦱ ᦉᦱ ᦠᦸᧉ、ᦘᦱ ᦉᦱ ᦟᦲᧉ ᦷᦌᧈ、ᦘᦱ ᦉᦱ ᦁᦱᧈ ᦌᦱᧂᧈ、ᦘᦱ ᦉᦱ ᦵᦑᦲᧉ ᦁᧂᧉ ᦜᦻ ᦘᦱ ᦉᦱ ᦊᦴᧈ ᦂᦲᧃ ᦐᧂᧉ ᦂᧃ ᦓᧃᧉ,ᦐᦱᧉ ᦵᦑᦲᧅ ᦦᦱᧂᧉ ᦖᦹᧃᧈ ᦔᦻ ᦗᧃ ᧕ ᦣᦾᧉ ᧒᧖ ᦘᦲᧃᧉ ᦝᦱᧂᧈ ᦅᦳᧂᧈ ᦟᦲ,ᦠᦱᧅ ᦔᦲᧃ ᦢᦱᧃᧉ ᦵᦙᦲᧂ ᦉ ᦜ ᦀᦱᧆ ᦐᧄ ᦇᦱᧄ ᦑᦲᧈ ᧑。
ᦺᦎᧉ ᦆᦳᧂ ᦉ ᦜ ᦀᦱᧆ ᦐᧄ ᦇᦱᧄ ᦓᦲᦰ ᦐᧄ ᦊᦴᧈ ᦃᦸᧇᧈ ᦵᦵᦡᧃ。ᦺᦎᧉ ᦆᦳᧂᧈ ᦔᦲᧃ ᦢᦱᧃᧉ ᦵᦙᦲᧂ ᦃᦸᧇᧈ ᦑᦱᧂᧉ ᦵᦵᦑ ᦆᧄ ᦕ ᦵᦑᧆ ᦣᧁ ᦑᦲᧈ ᧑,ᦠᦳᧃ ᦞᧃ ᦷᦎᧅ、ᦠᦳᧃᧉ ᦺᦎᧉ 、 ᦠᦳᧃ ᦵᦐᦲ ᦎᦲᧆ ᦋᦱᧇ ᦂᧇ ᦕ ᦵᦑᧆ ᦙᦱᧃᧈ,ᦃᦸᧇᧈ ᦵᦵᦡᧃ  ᦕᦵᦑᧆ ᦙᦲ ᧕ ᦣᦾᧉ ᦔᦻ ᧓ ᦜᧅ。ᦀᦸᧅᧈ ᦺᦎᧉ ᦆᦳᧂ ᦺᦔ ᦂᦻ ᦕ ᦵᦑᧆ ᦙᦱᧃᧈ ᦅᦸᧉ ᦺᦔ ᦣᦸᧆ ᦓᧄᧉ ᦵᦵᦙᧈ ᦉ ᦖᦳᧆ ᦊᦲᧃᧈ ᦎᦴᧈ ᦍᧂᧉ。ᦵᦙᦲᧈ ᦵᦉᦲᧅ ᦉᦳᧂ ᦩᦱᧄ ᦵᦐᦲ ᦷᦟᧅ ᦗᦸᧅ ᦒᦲ ᧒ ᦓᧃᧉ,ᦺᦎᧉ ᦆᦳᧂ ᦔᦲᧃ ᦉᦻ ᦑᦱᧂ ᦺᦊᧈ ᦐᧅ ᦁᧃ ᦑᦸᧉ ᦟᦱᧅ ᦃᦸᧂ ᦷᦆ ᦅᧄᧉ ᦵᦎᦲᧄᧈ ᦷᦋᧂᧈ ᦷᦅᧉ ᦝᧃ ᦵᦉᦲᧅ ᦉᦳᧂ ᦩᦱᧄ ᦓᧃᧉ ᦉᦲᧃᧉ ᧑。ᦠᦳᧃ ᦑᦱᧂ ᦍᦲᧃᧉ ᦓᦱᧃᧉ ᧞ ᦕᦵᦑᧆ ᦙᦱᧃᧈ ᦁᧃ ᦔᦲ ᦱ᧙᧓᧘ ᦷᦎ ᦜᦱᧉ ᦔᦲ ᦃᦳᧆ ᦔᦸᧂᧈ ᦂᧃ ᦓᧃᧉ ᦅᦸᧉ ᦃᧁᧉ ᦗᦻ ᦺᦎᧉ ᦆᦳᧂ ᦙᦱ,ᦑᦸᧉ ᦟᦱᧅ ᦃᦸᧂ ᦷᦆ ᦃᧁᧉ ᦙᦱ ᦅᧄᧉ ᦵᦎᦲᧄᧈ ᦷᦋᧂᧈ ᦷᦅᧉ ᦷᦜᧂ ᦜᦻ。ᦔᦲ ᦱ᧙᧔᧒ ᦷᦎ ᦒᦱ ᦠᦱᧃ ᦵᦵᦍᧃ ᦵᦋᦲᧃᧈ ᦋᦲᧃᧈ ᦱᦞ ᦖᦹᧃᧈ ᦅᦳᧃ ᦅᦸᧉ ᦟᦳᧅ ᦵᦵᦎᧈ  ᦺᦎᧉ ᦆᦳᧂ ᦀᦸᧅᧈ ᦺᦔ ᦕ ᦵᦑᧆ ᦙᦱᧃᧈ ᦝᧃ ᦵᦉᦲᧅ ᦉᦳᧂ ᦩᦱᧄ。
  ᦔᦲ ᦱ᧙᧘᧕ ᦷᦎ,ᦺᦎᧉ ᦆᦳᧂ ᦎᧂᧉ ᦧᦱᧂᧈ ᦺᦃ ᦎᦸᧈ ᦎᦱᧂᧈ ᦕ ᦵᦑᧆ,ᦊᦴᧈ ᦺᦓ ᦑᧂ ᦕ ᦵᦑᧆ ᦠᦱᧅ ᦀᦸᧃ ᦵᦗᦲᧃᧈ ᦌᧄᧉ。ᦔᦲ ᦱ᧙᧙᧒ ᦷᦎ ᦵᦙᦲᧂ ᦙᦱᧁ、ᦞᧃ ᦵᦑᧂᧈ ᦈᦸᧉ ᦷᦅᧉ ᦛᦴᧈ ᦵᦵᦊᧃᧈ ᦵᦉᧆ ᦃᦱᧆ ᦔᦲᧃ ᦵᦞᧂ ᦧᦱᧂᧈ ᦺᦃ ᦎᦸᧈ ᦎᦱᧂᧈ ᦑᦲᧈ ᦎᦱᧂᧈ ᦕ ᦵᦑᧆ,ᦎᧂᧉ ᦠᧃᧉ ᦙᦱ,ᦂᦱᧃ ᦅᦱᧉ ᦃᦻ ᦗᦻ ᦃᦸᧇᧈ ᦵᦵᦡᧃ ᦅᦸᧉ ᦔᦳᧂᧈ ᦵᦓᦲᧂ ᦺᦊᧈ ᦓᧅ。ᦺᦓ ᦷᦋᧈ ᦉᧅ ᦃᦱᧆ ᧙ᦞ ᦷᦎ,ᦙᦲ ᦵᦞ ᦟᦱ ᦔᦸᧆ ᧑ ᦂᦱᧃ  ᦺᦎᧉ ᦆᦳᧂ ᦅᦱᧉ ᦃᦻ ᦎᦸᧈ ᦕ ᦵᦑᧆ ᦙᦱᧃᧈ ᦠᦱᧅ ᦈᦱᧃᧈ  ᦂᦱᧃᧉ ᦕ ᦵᦑᧆ ᦣᧁ ᦅᦱᧉ ᦃᦻ ᦎᦸᧈ ᦕ ᦵᦑᧆ ᦙᦱᧃᧈ ᦓᧃᧉ ᦆᦹᧂᧈ ᦗᦻ ᦜᦻ, ᦍᦱᧄ ᦵᦙᦲᧈ ᦓᧃᧉ ᦵᦙᦲᧂ ᦙᦱᧁ ᦠᧃᧉ ᦅᦳᧃ ᦵᦵᦃᧅᧈ ᦙᧂᧈ ᦅᦹᧃ,ᦂᦱᧃ ᦅᦱᧉ ᦃᦻ ᦂᦱᧃᧉ ᦂᦳᧂᧈ ᦣᦳᧂᧈ ᦵᦣᦲᧂ ᦑᦰ ᦵᦵᦑᧉ。ᦔᦲ ᧒ᦞᦞᦞ ᦷᦎ ᦋᦳ ᦎᧂᧉ ᦷᦆᧄᧈ ᦞ ᦏᦳ ᦵᦋᧂ ᦂᧁᧈ(ᦵᦋ ᦂᦱᧁᧈ),ᦅᦹᧆ ᦵᦣᧆ ᦎᦱᧄ ᦵᦵᦢᧇᧈ ᦵᦔᦲᧂ ᦷᦔ ᦨᦱᧃ ᦎᦱᧂᧈ ᦒᦲ ᦁᧃ ᦺᦓ ᦵᦵᦡᧃ ᦕ ᦵᦑᧆ ᦣᧁ ᦺᦋᧉ ᦟᦱ ᦋ ᦅᦸᧂ ᦅᦱᧉ ᦃᦻ ᦵᦖᦲᧃ ᦊᦴᧈ ᦎᦱᧂᧈ ᦕ ᦵᦑᧆ ᦓᧃᧉ,ᦵᦣᧆ ᦡᧂᧈ ᦓᦲᦰ ᦍᦱᧄ ᦓᧃᧉ ᦠᦱᧅ ᦙᦲ ᦅᦱᧈ ᦷᦆᧄᧈ ᦞ ᦏᦳ ᦵᦋᧂ ᦂᧁᧈ ᦑᦲᧈ ᦵᦡᧁ。ᦔᦲ ᧒ᦞᦱᦱ ᦷᦎ ᦈᦸᧉ ᦕ ᦵᦑᧆ ᦵᦉᧆ ᦃᦱᧆ ᦔᦲᧃ ᦑᦲᧈ ᦷᦆᧄᧈ ᦟᦸᧈ ᦋᦱᧄ ᦔᦹᧆᧈ ᦉᦱᧂᧉ ᦧᦱᧂᧈ ᦺᦃ ᦑᦲᧈ ᦐᧅ ᦗᦻ ᦃᦸᧇᧈ ᦵᦵᦡᧃ。
ᦺᦎᧉ ᦆᦳᧂ ᦉ ᦜ ᦀᦱᧆ ᦐᧄ ᦇᦱᧄ ᦐᧄ ᦊᦴᧈ ᦺᦓ ᦔ ᦞᦲ ᦓᦲ ᦘᦱ ᦉᦱ。ᦺᦎᧉ ᦆᦳᧂ ᧞ ᦕ ᦵᦑᧆ ᦙᦱᧃ ᦓᦲᦰ ᦓᧄᧉ ᦣᦳᧄ ᦵᦵᦙᧈ、ᦡᦾ ᦣᦳᧄᧈ ᦗᦴ,ᦘᦱ ᦉᦱ ᦔᦲᧃ ᦃᦱᧉ ᦂᦳᧃ ᦵᦡᧁ ᦂᧃ,ᦺᦋᧉ ᦟᦲᧅ ᦷᦎ ᦵᦖᦲᧃ ᦂᧃ。 ᦔᦳᧃ ᦗᦻ ᦜᦻ ᦢᧁᧈ ᦙᦲ ᦓᧄᧉ ᦠᦽᧉ ᦃᧂᧉ ᦵᦵᦣᧉ ᦉᧂ,ᦠᦱᧅ ᦵᦖᦲᧃ “ᦑᦳᧂᧈ ᦔᦱᧈ ᦵᦡᧁ ᦂᧃ、᧒ ᦕ ᦵᦑᧆ、᧓ ᦵᦌᦲᧃ ᦌᦳᧄ  ᦂᧃ”᧞“ ᦓᧄᧉ ᦵᦵᦙᧈ ᦓᦹᧂ ᧒ ᦕ ᦵᦑᧆ ”、 “ᦢᦱᧃᧉ ᦓᦹᧂᧈ ᧒ ᦕ ᦵᦑᧆ”、 “ᦓᧄᧉ ᦢᦸᧈ ᦓᦹᧂᧈ ᧒ ᦕ ᦵᦑᧆ”ᦓᧃᧉ。
ᦺᦎᧉ ᦆᦳᧂ ᦙᦲ ᦘᦱ ᦉᦱ ᦺᦑ、ᦘᦱ ᦉᦱ ᦋᦲᧃ ᦷᦘᧈ ᧞ ᦘᦱ ᦉᦱ ᦠᦸᧉ  ᦜᦻ ᦘᦱ ᦉᦱ ᦊᦴᧈ ᦂᦲᧃ ᦐᧂᧉ ᦂᧃ,ᦋᦴᧈ ᦘᦱ ᦉᦱ ᦅᦸᧉ ᦈᧇ ᦃᦳᧂᧈ ᦟᦳᧂᧈ ᦂᧃ ᦵᦖᦲᧃ ᦅᦳᧃ ᦵᦣᦲᧃ ᦵᦡᧁ ᦂᧃ。ᦋᦴᧈ ᦘᦱ ᦉᦱ ᦍᧂ ᦺᦧᧈ ᦺᦗᧉ ᦺᦧᧈ ᦵᦃᧀ ᦎᦸᧈ ᦂᧃ, ᦵᦣᦲᧃ ᦵᦡᧁ ᦙᦲ ᦜᦻ ᦘᦱ ᦉᦱ ᦊᦴᧈᦂᦲᧃ ᦐᧂᧉ ᦂᧃ,ᦵᦣᦲᧃ ᧑ ᦁᧃ ᦜᦻ ᦓᧃᧉ ᦙᦲ  ᧕ ᦘᦱ ᦉᦱ。ᦋᦴᧈ ᦘᦱ ᦉᦱ ᦅᦸᧉ ᦙᦲ ᦓᦲᧉ ᦑᦱᧃ ᦠᦹᧂ ᦍᦱᧁᧈ ᧞ ᦔ ᦏ ᦙ ᦂᧇ ᦘᦳᧄ ᦉᦱᧂᧉ ᦷᦟᧅ ᦵᦵᦠᧂᧈ ᦆᦲᧂ、ᦙᦲ ᦙᦹᧉ ᦗᦾ ᦞᧃ ᦟᦱᧄ ᦁᧃ ᦉᦱᧈ ᦵᦉᦲᧃᧈ ᦷᦙᧃᧈ ᦵᦍᦲᧄ ᦓᧃᧉ。
  ᦩᦱᧄ ᦣᦴᧉ ᦞᧆ ᦒ ᦓ ᦒᧄ ᦉᦱ ᦉ ᦓᦱ ᦵᦏ ᦟ ᦞᦱᧆ ᦔᦲᧃ ᦩᦱᧄ ᦣᦴᧉ ᦞᧆ ᦒ ᦓ ᦒᧄ ᦙᦲ ᦠᦳᧃᧈ ᦵᦟᦲᧂᧈ ᦎᦱᧂᧈ ᦒᦲ ᦵᦵᦠᧂᧈ ᦘᦱ ᦉᦱ ᦓᦾᧉ ᦺᦎᧉ ᦆᦳᧂ, ᦘᦱ ᦉᦱ ᦺᦑ、ᦘᦱ ᦉᦱ ᦁᦱᧈ ᦌᦱᧂᧈ ᦠᦱᧅ ᦏᦹ ᦉᦱ ᦉ ᦓᦱ ᦵᦏ ᦟ ᦞᦱᧆ ᦌᧄᧉ,ᦢᦱᧃᧉ ᦺᦡ ᦷᦃᧂᧈ ᦓᧃᧉ ᦅᦸᧉ ᦙᦲ ᦞᧆ、ᦙᦲ ᦒᦱᧆ ᦌᧄᧉ。ᦒᦱᧆ ᦆᧄ ᦷᦜᧂ ᦵᦙᦲᧂ ᦧᦸᧃ ᦔᦲᧃ ᦒᦱᧆ ᦷᦂᧂ ᦺᦓ ᦁᧃ ᦑᧂ ᦒ ᦟᦲᧇ ᦊᦱᧈ ᦵᦋᦲᧁᧈ ᦺᦊᧈ ᦵᦜᦲ ᦵᦗᦲᧃᧈ ᦓᧃᧉ,ᦒᦱᧆ ᦵᦋᧂ ᦵᦜᧅ (ᦉᦴᧈ ᦗᧁᧈ ᦒᦱᧉ)、ᦞᧆ ᦵᦵᦉᧂ (ᦘᦴᧉ ᦒᦲᧉ ᦉᦹᧈ) 、 ᦒᦱᧆ ᦵᦞᧂ ᦵᦙᦲᧂ ᦟᦱᧉ、ᦒᦱᧆ ᦆᧄ ᦵᦋᧂ ᦵᦜᦲᧈ ᦚᦳᧂ ᦓᦲᦰ ᦜᦻ ᦑᦲᧈ ᦠᦱᧅ ᦔᦲᧃ ᦑᦲᧈ ᦞᦲᧉ ᦵᦉᧆ ᦉᦱ ᦉ ᦓᦱ ᦵᦏ ᦟ ᦞᦱᧆ,ᦔᦳᧃ ᦗᦻ ᦜᦻ ᦉᦱᧂᧉ ᦵᦵᦎᧂᧈ ᦵᦙᦲᧈ ᦌᦲᧃᧈ ᦌᦱᧁᧉ ᧞ ᦙᦲᧃᧉ ᦌᦱᧁᧉ。ᦘᦱ ᦉᦱ ᦋᦲᧂ ᦷᦗᧈ ᦔᦲᧃ ᦋᦱᧁ ᦗᦻ ᦡᦾ,ᦊᦴᧈ ᦺᦓ ᦘᦱ ᦉᦱ ᦓᦾᧉ ᦵᦖᦲᧃ ᦔᦲᧃ ᦘᦱ ᦉᦱ ᦵᦋᦲᧉ ᦵᦡᧁ ᦁᧃ ᦺᦋᧉ ᦔᦲᧈ ᦌᦴᧈ ᦵᦅᦲᧉ ᦟᦱᧃ ᦓᧃᧉ ᧞。ᦗᦾ ᦉᧂ ᦃᦱᧃ ᦔᦲ ᦺᦖᧈ ᦺᦑ、ᦗᦾ ᦙᦴᧉ ᦓᧁ ᦈᦳᧂᧈ ᦵᦅᦲᧉ ᦘᦱ ᦉᦱ ᦋᦲᧃ ᦷᦘᧈ、ᦗᦾ ᦀᦱ ᦜᦴᧈ ᦷᦞ ᦷᦟᧉ ᦘᦱ ᦉᦱ ᦁᦱᧈ ᦌᦱᧂᧈ、ᦗᦾ ᦷᦃᧈ ᦌᦹᧉ ᦘᦱ ᦉᦱ ᦟᦲᧉ ᦷᦌᧈ、ᦗᦾ ᦔᦲᧈ ᦖᦱᧅ ᦎᧁᧉ ᦚᦳᧂ ᦓᦲᦰ ᦠᦱᧅ ᦔᦲᧃ ᦂᦱᧃ ᦗᦾ ᦟᦱᧄ ᦵᦵᦠᧂᧈ ᦋᦴᧈ ᦘᦱ ᦉᦱ ᦺᦊᧈ ᦷᦜᧂ ᦓᧃᧉ,ᦔᦲ ᦺᦐ ᦅᦸᧉ ᦍᦸᦰ ᦓᧄ ᦅᦳᧃ ᦵᦵᦃᧅᧈ ᦙᦱ ᦷᦙᧃᧈ ᦵᦍᦲᧄ ᦜᦻ ᦱᦞ ᦖᦹᧃᧈ ᦅᦳᧃ。ᦊᦴᧈ ᦺᦓ ᦺᦎᧉ ᦆᦳᧂᧈ ᦅᦸᧉ ᦣᦸᧂᧉ ᦞᦱᧈ“ᦋᦱᧂᧈ ᦵᦑᧁ ᦑᦱᧂ ᦅᦸᧉ ᦋᦱᧂᧈ ᦝᦸᧃᧉ,ᦋᦱᧂᧈ ᦔᦱᧅ ᦅᦸᧉ ᦋᦱᧂᧈ ᦃᧇ”, ᦘᦱ ᦉᦱ ᦺᦡ ᦅᦸᧉ ᦋᦱᧂᧈ ᦣᦸᧂᧉ ᦋᦱᧂᧈ ᦝᦸᧃᧉ ᦋᦱᧂᧈ ᦃᧇ ᦌᧄᧉ。
  ᦺᦎᧉ ᦆᦳᧂ ᦉ ᦜ ᦀᦱᧆ ᦐᧄ ᦇᦱᧄ ᦐᧄ ᦊᦴᧈ ᦵᦵᦂᧁᧉ ᦵᦵᦉᧂ。ᦺᦎᧉ ᦆᦳᧂ ᦊᦴᧈ ᦺᦂᧉ ᦂᦲᧄᧈ ᦕ ᦵᦑᧆ ᦙᦱᧃᧈ ᦁᧃ ᦙᦲ ᦢᦸᧉ ᦵᦵᦣᧈ ᦵᦵᦂᧁᧉ ᦵᦵᦉᧂ ᦛᦲᧈ ᦺᦊᧈ ᦵᦜᦲ ᦵᦗᦲᧃᧈ ᦑᧂ ᦷᦟᧅ ᦓᧃᧉ。ᦵᦵᦎᧈ ᦂᦸᧃᧈ ᦙᦱ,ᦅᦸᧉ ᦔᦲᧃ ᦑᦱᧂ ᦷᦜᧂ ᦵᦵᦂᧁᧉ ᦵᦵᦉᧂ ᦃᧁᧉ ᦙᦱ ᦓᧃᧉ,ᦓᦲᧉ ᦑᦱᧃ ᦅᦱᧉ ᦃᦻ ᦵᦵᦂᧁᧉ ᦵᦵᦉᧂ ᦛᦲᧈ ᧞ ᦺᦧᧈ ᦺᦜ ᦩᦱᧄ ᦣᦴᧉ ᦎᦸᧈ ᦕ ᦵᦑᧆ ᦙᦱᧃᧈ ᦠᦱᧅ ᦙᦲ ᦺᦞᧉ ᦠᦹᧂ ᦍᦱᧁᧈ,ᦔᦲᧃ ᦑᦲᧈ ᦂᦱᧆ ᦅᦱᧉ ᦃᦻ ᦵᦵᦂᧁᧉ ᦵᦵᦉᧂ ᦛᦲᧈ ᦁᧃ ᦙᦲ ᦋᦹᧈ ᦵᦉᧂ ᦟᦹ ᦌᦱ ᦑᧂ ᦷᦟᧅ ᦓᧃᧉ,ᦠᦱᧅ ᦺᦡᧉ ᦋᦹᧈ ᦞᦱᧈ“ᦢᦱᧃᧉ ᦵᦙᦲᧂ ᦵᦵᦂᧁᧉ ᦵᦵᦉᧂ ᦛᦲᧈᦓᧃᧉ ᧞ ” 。
(ᦀᦻᧉ ᦉᦱᧄ)