new tai | old tai | 中文

ᦕᦴᧉ ᦓᧄ ᦵᦵᦀᧁᧈ ᦀᦲᦰ ᦂᦸᧂ ᦵᦵᦀᧃᧈ

作者: 时间:2020-11-12 10:41:24

  (ᦎᦸᦰ ᦈᧇ ᦌᦲᧈ ᧟)

  ᦵᦣᦲᧃ ᦀᦻᧉ ᦵᦵᦗᧂ ᦔᦲᧃ ᦅᦳᧃ ᦔᦳᧅᧈ ᦕᧅ,ᦷᦉᧃ ᦕᧅ ᦖᦴᧈ ᦔᦳᧅᧈ ᦕᧅ ᦅᦸᧉ ᦊᦴᧈ ᦣᦲᧄ ᦵᦞᧂ,ᦃᦱᧁᧉ ᦊᦴᧈ ᦣᦱᧁ ᦂᦲᧃ ᦵᦀᧂᧈ ᦺᦓ ᦵᦞᧂ ᦢᧁᧈ ᦺᦡᧉ,ᦑᧁᧈ ᦞᦱᧈ ᦎᦲᦰ ᦵᦀᧂᧈ ᦢᦱᧃᧉ ᦑᦳᧂᧈ ᦵᦵᦑᧉ ᦍᧂ ᦵᦜᦲ,ᦵᦗᦲᧃᧈ ᦞᦱᧈ ᦅᦳᧃ ᦖᦴᧈ ᦔᦳᧅᧈ ᦕᧅ ᦓᦲᦰ ᦀᦳᧃᧉ ᦢᧁᧈ ᦔᦲᧃ ᦠᦲᧃ ᦢᧁᧈ ᦺᦋᧈ。ᦀᦻᧉ ᦵᦵᦗᧂ ᦉᦸᧃᧈ ᦞᦱᧈ ᦔᦲᧃ ᦅᦳᧃ ᦃᦱᧂᧉ ᦂᦱᧆ,ᦁᦱ ᦈᦲᧃ ᦙᧃ ᦆᦹᧂᧈ ᧑ ᦔᦲᧃ ᦅᦳᧃ ᦺᦓ ᦵᦞᧂ,ᦔᦱᧅ ᧑ ᦅᦳᧃ ᦢᦱᧃᧉ ᦑᦳᧂᧈ,ᦎᧂᧉ ᦵᦵᦎᧈ ᦣᦴᧉ ᦈᧅ ᦂᧃ ᦵᦙᦲᧈ ᦟᦳᧃ ᦗᦾ ᦵᦡᦲᧃ ᧖ ᧟,ᦀᦻᧉ ᦵᦵᦗᧂ ᦃᧅ ᦙᦱ ᦵᦵᦀᧁᧈ ᦙᧃ,ᦙᧃ ᦠᦱᧅ ᦢᧁᧈ ᦟᦳᧂᧈ ᦎᦱ ᦵᦗᧆ ᦉ ᦟᦱᧇ ᦅᦱᧇ ᦀᦻᧉ ᦵᦵᦗᧂ,ᦠᦹᧂ ᦎᦱᧄ ᦠᦹᧂ ᦙᦱ ᦙᧃ ᦣᧄᧈ ᦗᦹᧂ ᦀᦻᧉ ᦵᦵᦗᧂ ᦔᦲᧃ ᦅᦳᧃ ᦌᦹᧈ ᦅᦸᧉ ᧑,ᦅᦸᧉ ᦷᦟᧆ ᦙᧅ ᦺᦈ ᦀᦻᧉ ᦵᦵᦗᧂ ᦠᧃᧉ ᧞。ᦃᧁ ᦊᦸᧅᧈ ᦂᧃ ᦺᦡᧉ ᦔᦲ ᦔᦻ,ᦀᦻᧉ ᦵᦵᦗᧂ ᦅᦸᧉ ᦺᦋᧉ ᦅᦳᧃ ᦙᦱ ᦵᦣᦲᧃ ᦀᦲᦰ ᦀᦸᧃᧈ ᦵᦵᦂᧁᧉ ᦀᦳᧇᧈ ᦵᦵᦃᧅᧈ ᦵᦠᦲᧃᧉ,ᦺᦎᧈ ᦎᦱᧄ ᦅᦳᧃ ᦺᦋᧉ ᦢᦸᧅᧈ ᦆᦱᧁᧈ ᦀᦻᧉ ᦵᦵᦗᧂ ᧟,ᦗᦸᧈ ᦵᦵᦙᧈ ᦀᦲᦰ ᦀᦸᧃᧈ ᦵᦵᦂᧁᧉ ᦅᦸᧉ ᦙᧅ ᦺᦈ ᦟᦴᧅ ᦵᦃᧀ ᦢᧁᧈ ᦵᦵᦑᧃ ᦓᦲᦰ。ᦀᦲᦰ ᦀᦸᧃᧈ ᦵᦵᦂᧁᧉ ᦵᦣᦲᧃ ᦊᦴᧈ ᦢᦱᧃᧉ ᦑᦳᧂᧈ ᦺᦂ ᦵᦙᦲᧂ,ᦵᦵᦎᧈ ᦷᦋᧈ ᦔᦴᧈ ᦖᦸᧃᧈ ᦅᦸᧉ ᦔᦲᧃ ᦅᦳᧃ ᦔᦳᧅᧈ ᦓᦱ ᦂᦲᧃ,ᦀᦲᦰ ᦀᦸᧃᧈ ᦵᦵᦂᧁᧉ ᦵᦂᦲᧆᧈ ᦢᦱᧃᧉ ᦑᦳᧂᧈ ᦺᦊᧈ ᦢᦱᧃᧉ ᦑᦳᧂᧈ,ᦑᧁᧈ ᦞᦱᧈ ᦙᧃ ᦷᦎ ᦡᦲ ᦟᧁ ᦇᦱᧄ,ᦊᦴᧈ ᦺᦓ ᦡᦱᧁᧉ ᦷᦃᧂᧈ ᦓᧃᧉ ᦔᦲᧃ ᦉᦱᧁ ᦟᦹ ᦅᦳᧃ ᧑,ᦅᦳᧃ ᦍᦲᧂ ᦃᦾ ᦅᦳᧃ ᦋᦻ ᦙᧅ,ᦅᦳᧃ ᦋᦻ ᦖᦴᧈ ᦺᦆᧈ ᦺᦡᧉ ᦙᧃ ᦅᦸᧉ ᦙᦲ ᦢᧁᧈ ᦺᦋᧈ ᦓᦾᧉ,ᦀᦲᦰ ᦀᦸᧃᧈ ᦵᦵᦂᧁᧉ ᦺᦈ ᦅᦹᧆ ᦉᦳᧂ,ᦙᧃ ᦢᧁᧈ ᦺᦆᧈ ᦗᦸᧅ ᦺᦔ ᦢᦱᧃᧉ ᦑᦳᧂᧈ,ᦢᧁᧈ ᦺᦆᧈ ᦗᦸᧅ ᦺᦔ ᦎᦸᦰ ᦉᦹᧇᧈ ᦃᦸᧉ ᦊᦴᧈ ᦣᦱᧁ ᦂᦲᧃ ᦗᦸᧈ ᦵᦵᦙᧈ,ᦞᦱᧈ ᦵᦵᦑᧉ ᦙᦱ ᦙᧃ ᦢᧁᧈ ᦺᦆᧈ ᦗᦸᧅ ᦺᦔ ᦔᦲᧃ“ᦅᦳᧃ ᦔᦳᧅᧈ ᦓᦱ ᦃᦱ ᦵᦎᧁᧈ ᦵᦜᦲᧂ”ᦵᦖᦲᧃ ᦗᦸᧈ ᦵᦵᦙᧈ ᦵᦠᦲᧃᧉ,ᦊᦴᧈ ᦺᦎᧉ ᦅᧄ ᦅᦹᧆ ᦵᦖᦲᧃ ᦀᦲᧉ,ᦙᧃ ᦅᦸᧉ ᦈᦲᧂᧈ ᦀᧁ ᦀᦻᧉ ᦵᦵᦗᧂ ᦔᦲᧃ ᦷᦕ ᧞。(6) (ᦍᧂ ᦢᧁᧈ ᦌᧄᧉ ᦵᦑᦲᧈ)   

   (ᦑᧁᧈ ᦵᦈᦲᧃᧈ ᦙᦲᧃᧉ ᦷᦂᧆ)