new tai | old tai | 中文

ᦟᦴᧅ ᦀᦸᧃᧈ ᦓᦾᧉ ᦠᦹᧉ ᦃᧅ ᦣᧄᧈ ᦵᦣᧃ ᦷᦎ

作者: 时间:2020-07-27 09:38:07

ᦝᧂ ᦑᦸᦰ ᦵᦵᦙᧈ ᦷᦎ ᦉᦳᧃ ᦉᦳᧃ ᦚᦳᧃ ᦵᦵᦂᧄ ᦵᦖᧀ ᦍᦾᧉ ᦠᦸᧄ ᦵᦑᧃ ᦕᧅ ᦷᦢᧈ,ᦔᦲᧃ ᦷᦠᧈ ᦟᦳᧂ ᦍᧄᧈ ᦍᦾᧉ ᦺᦢ ᦀᦾᧉ ᦂᦸᧂᧈ ᦇᦽ,ᦗᦲᧈ ᦙᦱ ᦑᦽ ᦎᦱᧄ ᦠᦸᧂᧉ ᦅᧄ ᦺᦘ ᦺᦃ ᦢᦸᧅᧈ,ᦺᦃ ᦏᦸᧅᧈ ᦠᦹᧉ ᦟᦴᧅ ᦀᦸᧃᧈ ᦓᦾᧉ ᦃᦹᧃᧉ ᦺᦊᧈ ᦆᦱ ᦟᦳᧃ,ᦔᦳᧃ ᦡᦲ ᦣᧅ ᧞ ᦵᦵᦗᧂ ᦵᦂᦲᧆᧈ ᦙᦱ ᦟᦳᧃ ᦜᦱᧉ,ᦜᦻ ᦅᦱᧈ ᦵᦜᧅ ᦃᦱ ᦓᦾᧉ ᦍᦲᧂ ᦋᦻ ᦑᦹᧅ ᦃᦹᧃᧉ ᦺᦊᧈ,ᦁᦱ ᦍᦳ ᦺᦡᧉ ᦱ᧖ ᦏᦹᧂ ᦱ᧗ ᦔᦲ ᦷᦎ ᦡᦲ ᦵᦓᦲᧉ ᦂᦱ ᦍᦱ ᦷᦖᧆ ᦺᦖᧈ,ᦐᦱᧉ ᦺᦓᧈ ᦺᦞᧉ ᦵᦵᦂᧄᧉ ᦃᦸᧂᧈ ᦕᦲᧁ ᦐᧄ,ᦈᦱ ᦀᦳ ᦔ ᦙᦱ ᦵᦖᦲᧃ ᦺᦙᧉ ᦐᦸᧈ ᦵᦵᦂᧁᧉ ᦟᧄ ᦌᦹᧈ,ᦑᦹᧅ ᦗᦳᧂᧈ ᦃᦹᧃᧉ ᦌᦲᧄ ᦌᦸᧃ,ᦂᦱᧇ ᦠᦸᧈ ᦀᦸᧄᧉ ᦵᦵᦞᧆ ᦟᦸᧄᧉ ᦵᦃᧁ ᦀᦸᧃᧈ ᦕᦲᧁ ᦇᦱᧄ,ᦍᧂ ᦢᧁᧈ ᦵᦵᦑᧃ  ᦷᦎᧅ ᦵᦣᧁ ᦉᦳᧂ ᦂᦸᧂᧈ ᦟᦳᧂ ᦗᦻ ᦺᦎᧉ,ᦊᦱᧈ ᦺᦡᧉ ᦵᦉ ᦵᦵᦙᧉ ᦉᦱᧃᧈ ᦡᦾᧉ ᦟᧄ ᦺᦙᧉ ᦵᦵᦙᧂ ᦢᦳᧂᧈ ᦦᧆ ᦔᦻ,ᦙᧃ ᦋᦱᧂᧈ ᦂᦻ ᦔᦲᧃ ᦺᦙᧉ ᦎᦱ ᦵᦵᦙᧂ ᦔᦻ ᦷᦔᧆᧈ,ᦷᦟᧆ ᦢᧁᧈ ᦋᦱᧂᧈ ᦗᦳᧂᧈ ᦃᦹᧃᧉ ᦵᦗᧂ ᦵᦵᦙᧈ ᦢᧁᧈ ᦙᦲ ᦵᦚᦲ,ᦓᦴ ᦵᦓᦲ ᦵᦜᧅ ᦃᦱ ᦓᦾᧉ ᦍᦲᧂ ᦋᦻ ᦃᦹᧃᧉ ᦺᦊᧈ,ᦅᧃ ᦞᦱᧈ ᦉᦴ ᦵᦵᦀ ᦢᧁᧈ ᦃᧅ ᦵᦣᧃ ᦷᦎ ᦈᦱ ᦵᦕᧅᧈ ᦵᦑᧄ ᦵᦖᦲᧃ ᦀᦲᧉ,ᦍᧂ ᦢᧁᧈ ᦵᦵᦑᧃ ᦏᧁᧉ ᦗᦱ ᦵᦗᦲᧃᧈ ᦎᦱᧃᧉ ᦟᧁᧈ ᦆᦱᧉ ᦵᦉ ᦷᦋᧈ ᦙᧃ ᦡᦻ。ᦜᦻ ᦅᦱᧈ ᦍᦲᧂ ᦋᦻ ᦓᦾᧉ ᦆᦱ ᦟᦳᧃ ᦃᦹᧃᧉ ᦺᦊᧈ,ᦅᦾᧈ ᦷᦋ ᦂᧃ ᦃᧅ ᦖᧃᧈ ᦵᦣᧃ ᦟᦲᧅ ᦂᧇ ᦷᦎ,ᦊᦱᧈ ᦺᦔ ᦷᦙ ᦙᧁ ᦵᦵᦀᧁᧈ ᦠᦱ ᦅᦱᧈ ᦘᦻᧉ,ᦊᦱᧈ ᦺᦔ ᦐᦱ ᦅᦱᧈ ᦺᦂᧈ ᦉᦱ ᦺᦂᧈ ᦗᦸᧃ ᦆᦸ ᦉᦾᧉ,ᦟᦴᧅ ᦀᦸᧃᧈ ᦓᦾᧉ ᦀᧁ ᦡᦲᧃᧉ ᦎᦸᧈ ᦂᧃ,ᦢᧁᧈ ᦺᦋᧈ ᦡᦲ ᦣᧂᧈ ᧞ ᦙᦲ ᦉᦹᧇᧈ ᦍᦱᧁ ᦵᦙᦲ ᦐᦱᧉ,ᦅᧃ ᦞᦱᧈ ᦍᦲᧃ ᦙᧃ ᦈᧇ ᦅᦸᧉ ᦋᦱᧂᧈ ᦟᦳᧂ ᦟᦹᧄ ᦚᦻᧈ ᦗᦻ ᦩᦱᧄ ᦣᦴᧉ,ᦗᦻ ᦟᦳᧃ ᦋᦱᧂᧈ ᦺᦡᧉ ᦺᦙᧈ ᦂᦲᧃ ᦵᦵᦐᧂ。ᦢᧆ ᦵᦡᧁᧈ ᦵᦣᧆ ᦂᦱᧃ ᦉᧂ ᦅᦸᧉ ᦊᦳᧂᧈ ᦈᧅ ᦊᦳᧂᧈ ᦍᦳᧃ ᦵᦣᧆ ᦌᧄᧉ,ᦢᧁᧈ ᦞᦱᧈ ᦂᦱᧃ ᦎᧅ ᦓᧄᧉ ᦎᧄ ᦃᧁᧉ ᦀᧁ ᦈᧅ ᦍᦳᧃ ᦐᦹᧂ,ᦂᦱᧃ ᦵᦣᧆ ᦺᦣᧈ ᦵᦵᦔᧂ ᦓᦱ ᦊᦳᧂᧈ ᦈᧅ ᦍᦳᧃ ᦵᦔᧃᧈ ᦵᦵᦣᧂ ᦵᦣᧆ ᦌᧄᧉ,ᦐᧂᧉ ᦞᦱᧈ ᦣᧁ ᦡᦲ ᦕᧆ ᦡᦽᧉ ᦷᦟᧆ ᦓᦾᧉ ᦍᧂ ᦗᦹᧂᧈ ᦟᦲᧅ ᦂᧇ ᦷᦎ,ᦋᦳᧄ ᦁᧃ ᦃᦻ ᦷᦆ ᦊᦳᧂᧈ ᦗᦻ ᦷᦆᧈ ᦌᦸᧉ,ᦕᧆ ᦡᦽᧉ ᦷᦟᧆ ᦟᦸᧉ ᦂᧇ ᦵᦵᦠᧂᧈ ᦍᦳᧃ ᦢᦲᧃ,ᦆᦻᧈ ᦵᦵᦠᧂᧈ ᦟᦰ ᦒᦱ ᦺᦝ ᦵᦵᦀᧁᧈ ᦵᦐᦲ ᦡᦲᧃ ᦕᦸᧇ ᦈᦸᧆᧈ,ᦕᧆ ᦵᦣᦲ ᦺᦝ ᦷᦜᧂ ᦵᦵᦀᧁᧈ ᦵᦐᦲ ᦵᦵᦙᧈ ᦓᧄᧉ ᦉ ᦖᦳᧆ ᦺᦊᧈ ᦉᦱ ᦅᦸᧃ,ᦎᦸᧂ ᦡᦾ ᦅᦸᧂᦰ ᦷᦜᧂ ᦵᦵᦔᧂ ᦑᦱᧂ ᦦᦱᧂᧉ ᦡᦲ ᦵᦟᧃᧈ ᦵᦂᧂᧉ,ᦙᦲ ᦑᧂ ᦑᦱᧂ ᦵᦵᦡᧃᧉ ᦗᦻ ᦗᦹᧃᧉ ᦑᧂ ᦓᧄᧉ ᦂᧇ ᦡᦲᧃ。ᦷᦃ ᦷᦜᧂ ᦓᧄᧉ ᦃᦸᧂ ᦆᧄ ᦵᦵᦙᧈ ᦺᦊᧈ,ᦍᧂ ᦢᧁᧈ ᦊᦳᧂᧈ ᦺᦙᧉ ᦉᧅ ᦜᦲᧄᧉ ᦡᦴ ᦵᦟᧃᧈ ᦎᦱᧃ ᦺᦖ,ᦐᧂᧉ ᦞᦱᧈ ᦷᦟᧆ ᦷᦜᧂ ᦑᦸᧉ  ᦷᦆ ᦙᦱ ᦐᧅ ᦓᦸᧂᧈ,ᦅᦸᧉ ᦍᧂ ᦢᧁᧈ ᦵᦝᦲᧂᧈ ᦛᧃ ᦺᦛ,ᦐᦲᧄ ᦺᦞᧉ ᦵᦖᦲᧃ ᦵᦵᦕᧃᧈ ᦡᦲᧃ ᦵᦙᦲᧂ,ᦢᧁᧈ ᦙᦲ ᦅᧄ ᦵᦅᦲᧂ ᦺᦈ ᦉᧅ  ᦃᦸᧉ,ᦍᦸᧃᧉ ᦵᦗᦲᧈ ᦗᦹᧂᧈ ᦂᧇ ᦡᦽᧉ ᦷᦆᧈ ᦌᦸᧉ ᦓᦱ ᦋᦱᧂᧈ ᦕᦊᦱ,ᦗᦹᧂᧈ ᦂᧇ ᦡᦽᧉ ᦩᦱᧄ ᦣᦴᧉ ᦑᧂ ᦟᦲᧅ ᦂᧇ ᦷᦎ。ᦅᧃ ᦞᦱᧈ ᦣᧁ ᦢᧁᧈ ᦣᦴᧉ ᦟᦲᧅ ᦷᦎ ᦡᦲ ᦵᦣᧆ ᦊᦱᧂ ᦣᦹ ᧞ ᦺᦡᧉ,ᦐᧂᧉ ᦞᦱᧈ ᦺᦠᧉ ᦞᧃ ᦆᧄᧈ ᦎᦱ ᦵᦵᦡᧂ ᦅᦸᧉ ᦡᦻ ᦵᦵᦟᧁ,ᦢᧁᧈ ᦵᦖᦲᧃ ᦵᦵᦌᧁ ᦵᦂᧂ ᦓᦾᧉ ᦆᦱ ᦟᦳᧃ ᦵᦜᧅ ᦀᦸᧃᧈ,ᦠᦹᧉ ᦋᦱᧂᧈ ᦊᦳᧂᧈ ᦏᦹ ᦵᦙᦲ ᦐᦱᧉ,ᦣᧁ ᦡᦲ ᦵᦣᧆ ᦂᦱᧃ ᦉᧂ ᦅᦸᧉ ᦢᧁᧈ ᦙᦲ ᦩᦱᧄ ᦣᦴᧉ,ᦵᦖᦲᧃ ᦢᦳᧂᧉ ᦎᦾᧈ ᦆᦴᧈ ᦢᧁᧈ ᦋᦱᧂᧈ ᦦᦱᧈ ᦑᦱᧂ ᦺᦡ。ᦵᦵᦀ ᦉᦴ ᦅᦾᧈ ᦷᦋ ᦂᧃ ᦣᧄᧈ ᦵᦣᧃ ᦟᦲᧅ ᦷᦎ ᦘᦸᧄᧉ ᦔᧃ ᦍᦱ ᦓᦱ ᦋᦱᧂᧈ,ᦠᦹᧉ ᦙᧃ ᦋᦱᧂᧈ ᦀᦱᧃᧈ ᦵᦵᦎᧄᧉ ᦋᦴᧈ ᦵᦋᦲᧉ ᦟᦲᧅ ᦷᦎ ᦘᦱ ᦉᦱ,ᦢᧁᧈ ᦞᦱᧈ ᦷᦎ ᦀ ᦵᦙ ᦟᦲᧉ ᦂᦱ ᦘᦸᧄᧉ ᦵᦵᦂᧁ ᦟᦱᧁ ᦺᦒ ᦙᦱᧃᧈ,ᦠᦹᧉ ᦙᧃ ᦈᦳᧇ ᦋᦱᧂᧈ ᦷᦏᧃᧉ ᦵᦵᦋ ᦌᧄᧉ ᦷᦎ ᦠᦸᧉ ᦵᦵᦃᧈ ᦈᦲᧃ,ᦷᦎ ᦺᦑ ᦣᦴᧉ ᦈᦳᧇ ᦏᦸᧂ ᦋᦱᧂᧈ ᦀᦱᧃᧈ,ᦈᦲᧂᧈ ᦔᦲᧃ ᦵᦵᦂᧁᧉ ᦅᦳᧃ ᦣᦴᧉ ᦵᦗᦲᧃᧈ ᦓᧇ ᦏᦹ ᦡᦲ,ᦷᦎᧅ ᦵᦵᦕᧁ ᦕᦵᦑᧆ ᦺᦡ ᦅᦸᧉ ᦢᧁᧈ ᦌᦳᧄ ᦎᦱ ᦐᦱᧉ,ᦵᦵᦙᧃᧈ ᦺᦡᧉ ᦵᦵᦀᧁᧈ ᦎᧁᧉ ᦵᦑᧁ ᦅᦱᧉ ᦅᦸᧉ ᦓᧇ ᦉᦸᧃ ᦜᦻ ᦆᦴ,ᦅᧃ ᦞᦱᧈ ᦈᧅ ᦵᦣᧆ ᦂᦱᧃ ᦉᧂ ᦅᦸᧉ ᦊᦳᧂᧈᦊᧄ  ᦷᦆ ᦌᦸᧉ,ᦅᧃ ᦙᦲ ᦐᧂᧉ ᦔᧃ ᦍᦱ ᦓᦱ ᦋᦱᧂ,ᦈᦱᧈ ᦷᦀᧆᧈ  ᦡᦽᧉ ᦑᦱᧂ ᦺᦡ ᦅᦸᧉ ᦠᦱᧅ ᦙᦲ ᦎᦱ ᦍᦸᧃᧉ,ᦵᦗᦲᧃᧈ ᦠᦱᧅ ᦀᦴᧉ ᦍᦸ ᦌᧄᧉ ᦺᦕ ᦢᧁᧈ ᦋᦱᧂᧈ ᦡᦴ ᦵᦵᦩᧃ,ᦵᦵᦋᧆ ᦵᦵᦋᧆ ᦔᦲᧃ ᦅᦳᧃ ᦡᦲ  ᦕᦸᧇ ᦈᦸᧆᧈ ᦵᦙᦲᧂ ᦵᦗᦲᧃᧈ ᦀᦴᧉ,ᦉᦴ ᦀᦲᧈ ᦀᦻᧉ ᦋᦳᧄ ᦓᦸᧂᧉ ᦖᦴᧈ ᦆᦱ ᦟᦳᧃ,ᦅᦾᧈ ᦷᦀᧆ ᦺᦈ ᦣᧄᧈ ᦵᦣᧃ ᦡᦲ ᦀᧁ ᦺᦞᧉ ᦺᦓ ᦷᦎ ᦂᧇ ᦷᦋᧈ,ᦙᧃ ᦷᦜᧈ ᦺᦡᧉ ᦜᦻ ᦵᦋᦲᧉ ᦂᧇ ᦷᦋᧈ ᦣᧁ ᦺᦔ,ᦜᦱᧉ ᦓᦸᧂᧉ ᦵᦠᧀᧈ ᦵᦵᦉᧂ ᦀᦸᧃᧈ ᦕᦊᦱ ᦺᦞ ᦋᦻ ᦵᦣᧀ。

(ᦗᦸᧈ ᦆᧄ ᦎᦳᧃ ᦷᦂᧆ)