new tai | old tai | 中文

ᦷᦢ ᦟᦱᧃ ᦉᦸᧃ ᦺᦈ

作者: 时间:2019-06-21 08:29:51

  ᦅᦳᧃ ᦺᦢᧉ ᦺᦋᧉ ᦌᦹᧅ ᦌᦹᧅ,

  ᦅᦳᧃ ᦜᧅ ᦓᦲᦰ ᦺᦋᧉ ᦅᧄ ᦵᦡᧁ;

  ᦅᦳᧃ ᦣᦻᧉ ᦅᦳᧃ ᦐᦱᧉ ᦟᦻ,

  ᦩᦻ ᦣᦻᧉ ᦩᦻ ᦡᧂ ᦠᧅ;

  ᦅᦳᧃ ᦙᦲ ᦇᦹᧃ ᦓᦲᦰ ᦺᦈ ᦉ ᦠᦱᧁ,

  ᦎᦻ ᦂᧇ ᦎᦱᧁ ᦕᦻ ᦵᦗᦲᧃᧈ ᦢᧁᧈ ᦟᦸᧆ;

  ᦅᦳᧃ ᦏᧁᧈ ᦢᧁᧈ ᦣᦴᧉ ᦺᦓ ᦒᧄ,

  ᦟᦳᧅ ᦜᦱᧃ ᦙᦱ ᦅᧃ ᦈᦲᧂᧈ ᦵᦵᦈᧂᧉ;

  ᦅᦳᧃ ᦔᦱᧅ ᦛᦱᧃ ᦓᦲᦰ ᦂᦳᧄᧉ ᦷᦉᧇ,

  ᦢᧁᧈ ᦡᦲ ᦍᧂᧉ ᦷᦣᧄ ᦵᦣᦲᧃ ᦙᧃ;

  ᦅᦳᧃ ᦏᧁᧉ ᦢᧁᧈ ᦙᦲ ᦟᦴᧅ ᦜᦱᧃ,

  ᦵᦟᧂᧉ ᦩᦻ ᦄᦱᧃ ᦈᦲᧂᧈ ᦵᦵᦈᧂᧉ;

  ᦅᦳᧃ ᦕᦱᧃ ᦋᦱᧂᧈ ᦃᦲᧉ ᦟᦻᧈ,

  ᦋᦱᧂᧈ ᦋᦳᧆ ᦚᦻᧈ ᦑᦱᧂ ᦂᦲᧃ;

  ᦅᦳᧃ ᦖᦸ ᦀᦴᧉ ᦖᦸ ᦟᦱᧆ ᦺᦓ ᦒᧄ,

  ᦑᦱᧂ ᦣᦴᧉ ᦐᧄ ᦵᦜᦲ ᦂᧁᧈ;

  ᦅᦳᧃ ᦺᦈ ᦇᦸ ᦃᦲᧉ ᦟᦻᧈ,

  ᦊᦱᧈ ᦛᦻᧈ ᦐᦱᧉ ᦺᦔ ᦋᦸᧄ;

  ᦅᦳᧃ ᦂᦲᧃ ᦊᦱ ᦚᦲᧃᧈ ᦊᦱ ᦙᦱᧉ,

  ᦅᦾᧈ ᦊᦴᧈ ᦅᦾᧈ ᦕᦱᧃ ᦵᦵᦅᧃ;

  ᦅᦳᧃ ᦑᧅ ᦍᧂ ᦈᧅ ᦡᦲ ᦊᦴᧈ,

  ᦕᦲ ᦑᧅ ᦍᧂ ᦈᧅ ᦣᦻᧉ;

  ᦅᦳᧃ ᦷᦉᧇ ᦵᦵᦌᧁ ᦋᦱᧂ ᦅᦱᧉ,

  ᦅᦳᧃ ᦅᦱᧉ ᦅᧄ ᦖᦸ ᦟᦻᧈ ᦵᦵᦗᧆ;

  ᦅᦳᧃ ᦜᧅ ᦓᦲᦰ ᦺᦡᧉ ᦺᦔ ᦑᦱᧂ ᦺᦎᧉ,

  ᦅᦳᧃ ᦺᦢᧉ ᦺᦡᧉ ᦺᦔ ᦑᦱᧂ ᦵᦐᦲ。

  ᦅᦳᧃ ᦺᦓ ᦢᧁᧈ ᦺᦔ ᦢᦸᧅᧈ,

  ᦅᦳᧃ ᦓᦸᧅ ᦢᧁᧈ ᦋᦱᧂᧈ ᦙᦱ ᦀᧁ;

  ᦅᦳᧃ ᦎᦱ ᦔᧁ ᦓᦸᧃ ᦺᦡᧉ,

  ᦅᦳᧃ ᦵᦟᦲᧆ ᦺᦖᧉ ᦓᦲᦰ ᦓᦸᧃ ᦵᦡᦲᧅ;

  ᦅᦳᧃ ᦐᦱᧉ ᦺᦓᧈ ᦓᦲᦰ ᦔᦱᧅ ᦛᦱᧃ,

  ᦅᦳᧃ ᦕ ᦊᦱ ᦕᦻ ᦙᦲ ᦓᧄᧉ ᦣᦴᧉ。

  (ᦗᦸᧈ ᦷᦢ ᦺᦣ)