本版导航 各版导航 视觉导航 标题导航
选择其他日期报纸

ᦵᦌᦲᧃᧉ ᦊᦲᧈ ᦵᦆᦲᧁᧉ ᦊᦴᧈ ᦷᦣᧂ ᦵᦣᧃ ᦺᦓ ᦵᦞᧂ ᦆᧄ ᦑᦸᧂᦰ ᦵᦌᦲᧄᧉ ᦵᦵᦐᧃᧉ   ᦵᦵᦏᧄ ᦵᦵᦃᧂ ᦵᦵᦣᧂ ᦂᦱᧃ ᦉᧂᧈ ᦉᦸᧃ ᦍᦸᦰ ᦓᧄ ᦠᦹᧉ ᦟᦴᧅ ᦀᦸᧃᧈ ᦵᦡᧅ ᦃᦱ ᦋᦴᧈ ᦘᦱ ᦉᦱ ᦷᦔᧅ ᦎᧂᧉ ᦃᧃ ᦎᦲᦰ ᦩᦱᧄ ᦛᧂ ᦵᦵᦆᧃᧉᦍᦲᧂᧈ ᦷᦍᧆ

西双版纳报新傣文 新闻    时间:2018年06月10日    来源:西双版纳报新傣文

ᦃᦱᧁᧈ ᦉᦱᧃ ᦷᦣᧂ ᦐᧂ ᦉᦹ ᦘᦲᧄ ᦵᦡᦲᧃ ᧖ ᦷᦟᧅ ᦀᦸᧅᧈ ᦆᧄᧈ ᧑ ᦞᧃ ᦗᦾ ᦟᦴᧅ ᦀᦸᧃ ᦵᦡᧅ ᦃᦱ ᦵᦐᦲ ᦷᦟᧅ ᦙᦱ ᦣᦸᧆ ᦞᧃ ᦓᧃᧉ,ᦵᦌᦲᧃ ᦵᦈᦲᧃᧈ ᦵᦌᧉ ᦚᦴᧈ ᦋᦴ ᦌᦲᧉ、ᦵᦋᦲᧁᧈ ᦞᦼ ᦌᦴᧈ ᦈᦲᧈ ᦵᦌᦲᧃᧉ ᦊᦲᧈ ᦵᦆᦲᧁᧉ ᦺᦔ ᦆᧄ ᦑᦸᧂᦰ ᦷᦣᧂ ᦵᦣᧃ ᦵᦊᧁᧈ ᦵᦁᦲᧉ ᦵᦵᦍᧃᧉ ᧞ ᦷᦣᧂ ᦵᦣᧃ ᦓᦾᧉ ᦺᦓ ᦵᦞᧂ ᦟᦱᧂ ᦑᦲᧈ ,ᦉᦲᧂᧈ ᦏᦱᧄ ᦂᦱᧃ ᦟᦴᧅ ᦀᦸᧃᧈ ᦵᦡᧅ ᦃᦱ ᦑᧂ ᦜᦻ。ᦑᦱᧃᧈ ᦵᦌᦲᧄᧉ ᦵᦵᦐᧃᧉ,ᦟᦴᧅ ᦀᦸᧃ ᦵᦡᧅ ᦃᦱ ᦠᦱᧅ ᦔᦲᧃ ᦩᦱᧄ ᦛᧂ ᦕᦵᦑᧆ ᦢᦱᧃᧉ ᦵᦂᦲᧆᧈ ᦵᦙᦲᧂ ᦔᦲᧃ ᦐᦲᧉ ᦵᦙᦲ ᦐᦱᧉ、ᦩᦱᧄ ᦛᧂᦘᦱ ᦉᦱ ᦓᧃᧉ。ᦷᦣᧂ ᦂᦱᧃ ᦋᦴᧈ ᦏᦱᧃᧉ ᦋᦴᧈ ᦑᦲᧈ ᦈᧅ ᦺᦡᧉ ᦏᦹ ᦐᧅ ᦵᦑᦲᧅ ᦗᦹᧃ ᦂᦱᧃ ᦉᧂᧈ ᦉᦸᧃ,ᦵᦵᦋᧆ ᦵᦵᦋᧆ ᦅᦻ ᦵᦋᧉ ᦂᦱᧃ ᦵᦂᦲᧆ ᦃᧄ ᦌᦸᧂᧈ ᦐᦱᧉ ᦁᧃ“ᦺᦡᧉ ᦃᧁᧉ ᦵᦣᧃ、ᦺᦆᧈ ᦃᧁᧉ ᦵᦣᧃ、ᦣᧄᧈ ᦵᦣᧃ ᦡᦲ”ᦓᧃᧉ ᦠᦹᧉ ᦡᦲ,ᦵᦵᦏᧄ ᦵᦵᦃᧂ ᦵᦵᦣᧂ ᦉᧂᧈ ᦉᦸᧃ ᦍᦸᦰ ᦓᧄ,ᦠᦹᧉ ᦟᦴᧅ ᦀᦸᧃᧈ ᦵᦡᧅ ᦃᦱ ᦋᦴᧈ ᦘᦱ ᦉᦱ ᦷᦔᧅ ᦎᧂᧉ ᦩᦱᧄ ᦛᧂ ᦍᦲᧂᧈ ᦷᦍᧆ,ᦺᦊᧈ ᦐᦱᧉ ᦂᦱᧉ ᦢᦱᧃ ᦙᦱ ᦔᦲᧃ ᦓᧅ ᦕᦱᧆ ᦅᦳᧃ ᦣᦴᧉ ᦙᦲ ᦑᦲᧈ ᦺᦋᧉ ᦊᦳᧂᧈ ᦁᧃ ᦎᦸᧇᧈ ᦔᧂ ᦕᦵᦑᧆ ᦢᦱᧃᧉ ᦵᦂᦲᧆ ᦙᦲᧂ ᦔᦲᧃ ᦓᧃᧉ。
    ᦵᦌᦲᧃᧉ ᦊᦲᧈ ᦵᦆᦲᧁᧉ ᦓᧄ ᦗᦱ ᦖᦴᧈ ᦆᧄ ᦑᦸᧂᦰ ᦀᦸᧃ ᦋᦸᧄ ᦺᦔ ᦏᦹᧂ ᦷᦣᧂ ᦵᦣᧃ ᦵᦊᧁᧈ ᦵᦁᦲᧉ ᦵᦵᦍᧃᧉ ᦢᦱᧃᧉ ᦐᦸᧂ ᦝᦸᧂ、ᦵᦊᧁᧈ ᦵᦁᦲᧉ ᦵᦵᦍᧃᧉ ᦉᦹᧈ ᦋᦲ ᦋᦲᧃᧈ ᦵᦵᦍᧃᧉ ᦵᦋᧂ ᦣᦳᧂᧈ ᦉᦹᧈ、ᦷᦣᧂ ᦵᦣᧃ ᦓᦾᧉ ᦉᦹᧈ ᦋᦲ ᦋᦲᧃᧈ ᦵᦵᦍᧃᧉ ᧞ ᦷᦣᧂ ᦵᦣᧃ ᦓᦾᧉ ᦒᦲ ᧓ ᦵᦋᧂ ᦣᦳᧂᧈ ᦉᦹᧈ,ᦘᦸᧄᧈ ᦺᦧᧈ ᦺᦜ ᦎᦸᧈ ᦟᦴᧅ ᦀᦸᧃ ᦵᦡᧅ ᦃᦱ ᦑᧂ ᦜᦻ,ᦈᦹ ᦔᦱᧃᧉ ᦀᦳᧃᧈ ᦑᦳᧃ ᦺᦈ ᦟᦴᧅ ᦀᦸᧃ ᦑᧂ ᦜᦻ ᦵᦵᦎᧈ ᦓᦾᧉ ᦂᦑᧄ ᦟᦱᧂ ᦵᦗᧆ ᦡᦲ,ᦔᦲᧃ ᦵᦔᦲᧂ ᦵᦵᦍᧂ ᦓᦾᧉ ᦁᧃ ᦙᦲ ᦩᦱᧄ ᦛᧂ、ᦙᦲ ᦩᦱᧄ ᦕᦱᧆ ᦏ ᦐᦱ、ᦠᦳᧄ ᦣᧄᧈ ᦵᦣᧃ、ᦠᦳᧄ ᦵᦣᧆ ᦂᦱᧃ、ᦠᦳᧄ ᦊᦱᧃᧈ ᦉᦱᧂᧉ、ᦠᦳᧄ ᦕᦵᦑᧆ ᦢᦱᧃᧉ ᦵᦂᦲᧆᧈ ᦵᦙᦲᧂ ᦔᦲᧃ ᦓᧃᧉ,ᦺᦊᧈ ᦐᦱᧉ ᦂᦱᧉ ᦢᦱᧃ ᦙᦱ ᦵᦉ ᧟ ᦔᦲᧃ ᦕᦴᧉ ᦎᦸᦰ ᦉᦹᧇᧈ ᦋᦸᧂᧈ ᦂᦱᧃ ᦕᦵᦑᧆ ᦢᦱᧃᧉ ᦵᦂᦲᧆᧈ ᦵᦙᦲᧂ ᦔᦲᧃ ᧞ ᦺᦘᧈ ᦵᦙᦲᧂ ᦓᧃᧉ ᦺᦗ。
    ᦊᦴᧈ ᦵᦙᦲᧈ ᦣᧇ ᦝᧂ ᦷᦣᧂ ᦂᦱᧃ ᦎᦲᧆ ᦋᦱᧇ ᧞ ᦂᦸᧃᧈ ᦀᦸᧃ ᦷᦣᧂ ᦵᦣᧃ ᦢᦸᧅᧈ ᦔᦱᧁᧈ ᦵᦟᦲᧂᧈ ᦂᦱᧃ ᦎᦲᧆ ᦡᦽᧉ ᦅᦹᧆ ᦵᦣᧆ ᦎᦱᧄ ᦺᦈ ᦩᦱᧄ ᦘᦸᧄᧉ ᦉᦲᧂ ᦷᦈ ᦂᦱᧃ ᦉᧂᧈ ᦉᦸᧃ ᦑᧂ ᦵᦋᦲᧁᧈ ᦵᦉ ᧟,ᦵᦌᦲᧃᧉ ᦊᦲᧈ ᦵᦆᦲᧁᧉ ᦵᦌᦲᧄᧉ ᦵᦵᦐᧃᧉ,ᦉᧂᧈ ᦉᦸᧃ ᦍᦸᦰ ᦓᧄ ᦟᦴᧅ ᦀᦸᧃᧈ ᦷᦔᧅ ᦎᧂᧉ ᦩᦱᧄ ᦛᧂ ᦍᦲᧂᧈ ᦷᦍᧆ,ᦂᦱᧉ ᦋᧄ ᦷᦠ ᦺᦈ ᦢᦳᧃ,ᦂᦱᧃ ᦒᦱᧄ ᦷᦣᧂ ᦂᦱᧃ ᦋᦴᧈ ᦏᦱᧃᧉ ᦋᦴᧈ ᦑᦲᧈ ᦐᧅ、ᦷᦑᧅ ᦊᦱᧇ 。ᦷᦣᧂ ᦵᦣᧃ ᦈᧅ ᦺᦡᧉ ᦡᦽᧉ ᦎᦱᧄ ᦩᦱᧄ ᦛᧂ ᦁᧃ ᦷᦔᧅ ᦎᧂᧉ ᦁᦱ ᦈᦲᧃᦡᦲ ᦓᧃᧉ,ᦀᧁ ᦂᦱᧃ ᦉᧂᧈ ᦉᦸᧃ ᦁᦱ ᦈᦲᧃ ᦡᦲ ᦞᦱᧂ ᦺᦞᧉ ᦑᦲᧈ ᦐᧅ,ᦵᦵᦏᧄ ᦵᦵᦃᧂ ᦵᦵᦣᧂ ᦂᦱᧃ ᦉᦱᧂᧉ ᦵᦵᦎᧂᧈ ᦟᦱᧂ ᦵᦗᧆ ᦷᦣᧂ ᦵᦣᧃ、ᦆᦴ ᦉᦸᧃ ᦁᦱ ᦈᦲᧃ ᦡᦲ ᦕᦸᧇ ᦈᦸᧆᧈ,ᦺᦎᧈ ᦎᦱᧄ ᦑᦲᧈ ᦎᦱᧂᧈ ᦟᦴᧅ ᦀᦸᧃᧈ ᦵᦡᧅ ᦃᦱ ᧞ᦆ ᦢᦲᧆ ᦺᦊᧈ ᦐᦱᧉ ᦂᦱᧉ ᦢᦱᧃ,ᦍᦸᦰ ᦓᧄ ᦟᦴᧅ ᦀᦸᧃᧈ ᦣᧄᧈ ᦵᦣᧃ ᦟᦲᧅ ᦷᦎ,ᦂᦱᧉ ᦋᧄ ᦉᧂᧈ ᦉᦸᧃ ᦡᦲ ᦡᦲ,ᦀᦸᧅᧈ ᦵᦵᦣᧂ ᦵᦣᧆ ᦣᦸᧆ ᦊᦴᧈ ᦷᦣᧂ ᦵᦣᧃ ᦣᧄᧈ ᦵᦣᧃ ᦢᧁᧈ ᦑᧁᧈ ᦅᦱᧈ ᦌᦸᧃᧉ ᦉᦹᧇᧈ ᦩᦱᧄ ᦣᦴᧉ、ᦆᦹᧃ ᦌᦸᧃᧉ ᦉᦹᧇᧈ ᦁᦱ ᦈᦲᧃ ᦡᦲ,ᦵᦵᦕᧈ ᦵᦓᦲᧂ ᦂᦱᧃ ᦡᦲᧃᧉ ᦷᦙᧃᧈ ᦢᧁᧈ ᦑᧁᧈ ᦅᦱᧈ ᦵᦓᦲᧉ ᦷᦎ ᦵᦵᦂᧃᧈ ᦃᧃ、ᦵᦵᦆᧃᧉ ᦆᦹᧃ ᦣᦴᧉ ᦣᦲᧆ ᦣᦴᧉ ᦅᦸᧂ,ᦠᦹᧉ ᦵᦋᦲᧉ ᦝᧃ ᦁᧃ ᦵᦕᧀ ᦵᦵᦕᧈ ᦩᦱᧄ ᦑᦸᧂᦰ ᦃᧃ ᦅᦱᧈ ᦵᦵᦂᧃᧈ ᦉᦱᧃ ᦵᦉᦲᧈ ᦃᦼᧈ ᦋᦴ ᦊᦲᧈ ᦊᦴᧈ ᦺᦓ ᦺᦈ ᦟᦴᧅ ᦀᦸᧃᧈ ᦑᧂ ᦜᦻ ᦊᧂᧈ ᦣᦱᧅ ᦎᦱᧅ ᦵᦚᦲ ᦺᦗ。 (ᦷᦆᧉ ᦌᦲᧈ ᦌᦲᧈ)